SakkoKolonia CD 6
»Nä, wat en Hellige Naach!«
Chressdags-Tön hatte mer em Büggel met uns CDs eijentlich luuter dobei. Nohdäm uns eetste Chressdags-CD letz Johr 2009 bes op de letzte Plaat fott wor, mohte mer uns üvverläje: die ahle Plaat nopresse losse odder en neu CD opnemme...? Un dobei stellte mer et uns ärg schwer vör, noch ens su en schön Chressdagsplaat wie "Chressdagsleedcher un Adsventskranzkrätzcher" hinzekrijje. Die hatte mer jo ald 2004 noch em Trio opjenomme... Op dä andere Sick jov et jitz jo esu vill neu Chressdags-leedcher, die all ens jään selvs op en Plaat eruskumme wollte. – No jot, dann also doch...
En neu CD woodt jeplant un de Ärbeit dodran aanjefange.
En jroße Freud wor et dann för uns, dat mer met dä Hölp vun jode Fründe rechne kunnte! Zoeets ens André Wedel, dä sich noch ens breitschloge leet, uns en singem klein Studio opzenemme!!!
Un donoh kom och noch brilliante musikalische Hölp:
Zoeets kom dä Engelbäät Wrobel - för in sage se och »Mister Clarinett« - en et Studio: ene echte Virtuos op singe Blosinstrumente, Klarinette un Saxophon. Hä jov zwei Stückelcher »Chresskindche kütt« un »O do klein Dörfche Bethlehem« e richtig Sahnehäubche, endäm hä wunderschön för un met uns jetrööt hat. (Esu säht hä selvs dozo.) Ungerstötzung kom och vum Thomas Cüpper – däm »Klimpermännche«. Hä hät zoeets ens ene Püngel leeve chressdägliche Rümcher för uns jeschrivve, wie dat dolle »Fessmenue«, met däm mer schon zick e paar Johre richtig vill Spaß op der Bühn jehatt han. Dä Thomas hät och dat Rümche üvver sing Tant Hilde met dem Titel »Nä, wat en Hellige Naach!« jeschrivve, zoletz heiß jetz die janze CD esu... Wä hät dann besser jewuß, wie dies Tant Hilde klinge moht? Et es doch schleeßlich sing Tant! Un esu kom hä en et Studio un sang met uns zesamme met singer markante helle Stemm dat Leedche en.
En echte Bereicherung wor och de unverwechselbare Stemm vun unsem ahle Fründ, däm Bluessänger Peter Lorenz, dä uns bei'm Ensinge vun däm Spiriual »Jangk, saach et alle Minsche« sing Röhr jeliehnt un domet de schwatzamerikanische Färvung vun däm besondere Stückelche metjestalt hät.
Un zoletz ävver nit als et Letzte unse ahle Metspeler Wolfjang »Schmal« Seyffert: Nohdäm sich uns sakkokolonistische Wäje ald 2004 jetrennt hatte, hät jitz eine Aanrof jenög un dä Schmal hät met singer Flitsch ene entscheidende Däu bei de italienische Atmosphäre op dä »Tralalatarantella« dobeijedonn.
Un wat es erusgekumme? En wunderschöne CD för de Adventszick met vill ungerscheedliche musikalische Facette.
Un die Leedcher sin drop:
1. Alles hät sing Zick (Text und Musik: Hans Rudolf Knipp/Bläck Fööss (d.h.: Karl Friedrich
Biermann, Ralph Gusovius, Günter Lückerath, Hartmut Priess, Wilhelm Schnitzler, Peter Schütten,
Ernst Stoklosa)
2. Nä, wat en Hellige Naach! (Text: Thomas P. Cüpper, Musik: Theo Krumbach, Dr. Bettina Wagner)
3. Freud för de Ääd (Text und Arrangement: Theo Krumbach, Dr. Bettina Wagner nach Ludwig van
Beethoven „Ode an die Freude“ und Georg Friedrich Händel „Joy to the worlda)
4. Höösch Lück! Besennt üch! (Text und Arrangement: Theo Krumbach, Dr. Bettina Wagner nach
Georg Friedrich Händel, „Lascia ch‘io pianga“, Arie der Almirena in der Oper „Rinaldo“, 1711)
5. Chresskindche kütt (Text und Musik: Theo Krumbach, Dr. Bettina Wagner)
6. Wat e Kreppche! (Text und Musik: Henner Berzau)
7. Tralalatarantella (Text und Musik: Theo Krumbach, Dr. Bettina Wagner,
nach einem neapolitanischen Volkslied)
8. Geschenkpapier (Text und Musik: Theo Krumbach, Dr. Bettina Wagner)
9. Iesblome (Text und Musik: Henner Berzau)
10. Winter em Dörp (Text: Hans Rudolf Knipp, Musik: Hans Rudolf Knipp/Bläck Fööss (d.h.: Günter
Lückerath, Hartmut Priess, Wilhelm Schnitzler, Peter Schütten, Ernst Stoklosa)
11. Et Fritzche un de Decke Trumm (Text: Toni Buhz, Musik: Theo Krumbach, Dr. Bettina Wagner)
12. Et Fessmenue (Text: Thomas P. Cüpper nach einer Geschichte von Elfi Steickmann,
Musik: Theo Krumbach, Dr. Bettina Wagner)
13. Jangk, saach et alle Minsche (Text und Arrangement: Theo Krumbach, Dr. Bettina Wagner,
nach dem Spiritual „Go tell it on the mountain“)
14. O do klein Dörfche Bethlehem (Text und Arrangement: Theo Krumbach, Dr. Bettina Wagner,
nach einem anglikanischen Carol von Lewis H. Redner,T: Phillips Brooks, 1869)
15. Wann ich meer jet wünsche künnt (Text: Thomas P. Cüpper, Musik: Theo Krumbach,
Dr. Bettina Wagner)