Links, nit räächs

© Copyright SakkoKolonia, 2018

Dateschutz

Impressum

Bettina Wagner

Singe, Jittalele & Lavumm

Dä Döres säht för it och "Dat Tini"

 

Op de Ääd ben ich in Opladen jekumme. Ich wor noch ärg

klein, do deihten ming Eldere faßstelle, dat ich nix wie Singe,

Danze un mich Maskeere em Kopp hatt. Su deiht ich mich

als kleine Ditz och immer wie jeck op Fastelovend freue un

wor et janze Johr am üvverläje, wat för e Kostüm ich

drage künnt - minge Draum, su e richtig Funkemarieche ze

wääde, woodt ävver nie wohr.

 

Wie ich fünef Johr alt wor, do hatt ich et mer en der Kopp

jesatz, dat ich Klavierspille künne wollt. Domols lierte mer

dat natörlich „aanständig“ un su wore baal Beethoven un

Mozart ming beste Fründe. Dat met däm Singe jingk dobei

ävver nit esu jot. Su moot ich mer selvs e bessje Jittaspille

beibrenge, domet ich winnigstens e paar Leedcher bejleite

kunnt. Un weil mer dat met däm Danze un Singe su am

Hätz log, han ich dodren sujar en Schull besöök un han dann zoeets als Lehrerin de Musik zo mingem Job jemaht. Dat wor et ävver noch nit all! Ich kunnt de Nas nit voll krijje! Su han ich donoh dann och noch aanjefange op de Unität Musikwesseschaff ze studeere un han schleeßlich sujar minge Dokter dodren jemaht. En dä Zweschezick han ich och nevvenbei aanjefange, en Bands un esu ze singe.

 

En de 80er Johre hatt ich dann e Fisternöllche met enem ech kölsche Jung, däm Döres. Jo, un wie su jet mänchmol es, hät et ööntlich jefunk, un ih mer zwei et bejreffe han, hatte mer uns esu metenein verknöddelt, dat mer bes hück nit rääch wesse, wie mer dat jemaht han. De Musik wor wohl et Wichtigste dobei. Doch denk ich hück och mänchmol, dä Charme vun dä kölsche Sproch vun däm Döres hät och jet dozo beijedrage, dat ich als „Mädche us‘em Berjische Land“ vun däm Tuppes un us Kölle nit mih fottwollt.

 

Mer zwei han su noh un noh vill vun denne ahle kölsche Leedcher usjebuddelt un jesunge, zoeets nor för Spaß bei uns zohus, ov och för ming Mamm. Ich jläuv, ming Bejeisterung wor schleeßlich dä Motor doför jewäse, dat mer su jet och ens för Fründe und zoletz och ens en der Weetschaff jesunge han. Jetz kom ävver noch die Frog, wie dann dat neu Kindche, die neu Kapell heiße sollt... - Säht dä Döres för mich: „Sag ens, wat solle mer üvverhaup aantrecke, wann mer dat Krätzjer-Jedöns unger de Lück brenge?“ „Och“, sagen ich, „do künnte mer doch jot me’m Sakko jonn, domet es mer doch immer jot aanjetrocke.“ - Mer zwei han nämlich ene zemliche Fimmel me'm Sakkos-Drage - Un do es dä Döres drop jekumme, dat mer jo schön SakkoKolonia heiße künnte. Jo, un esu es dat dann all jekumme...

 

Dat all es jetz ald rääch lang her. Mer sin zickdäm ärg vill opjetrodde un han

esu vill Leedcher zesamme met däm „Schmal“ Wolfjang Seyffert jesunge.

Klor, dat et för uns all ärg schwer wor, wie hä uns em Sommer 2005 verloße deiht.

Zoeetz wore mer richtig jet durchenein dovun. Zoletz hät sich dann ävver jezeig,

dat et em Duett, also suzesage en der Urbesetzung jenauesu jot fluppe deiht met SakkoKolonia. Däm Schmal wünsche mer natörlich wiggerhin alles Jode beim Musikmaache un och söns. Dat es doch klor!